festa---draft

Sterkari rödd Íslands í ETS er forsenda samkeppnishæfni og árangurs í loftslagsmálum

Thu, 04 Jun 2026 12:06:04 GMT

Ályktun Loftslagsleiðtoga Festu

Í dag sendi Festa sameiginlega ályktun frá Loftslagsleiðtogum Festu um viðskiptakerfi Evrópusambandsins um losunarheimildir (ETS-kerfið) á umhverfis-, orku- og loftslagsráðuneytið, fjármálaráðuneytið, utanríkisráðuneytið, atvinnuvegaráðuneytið og innviðaráðuneytið. Undir ályktunina skrifa 18 forstjórar úr hópi Loftslagsleiðtoga Festu auk framkvæmdastjóra Samtaka Atvinnulífsins og stjórnarformanns Festu.

ETS kerfið hefur verið mikið í umræðunni undanfarna mánuði, en kerfið er eitt virkasta tól Evrópusambandsins til að draga úr losun frá þeim geirum sem heyra undir kerfið, svo sem frá flugi, skipaflutningum og iðnaði. Umræddar atvinnugreinar eru sérlega mikilvægar íslensku samfélagi og því brýnt að öll umsýsla, hagsmunagæsla, upplýsingagjöf og ráðstöfun opinberra tekna sem tengjast kerfinu sé sem allra skýrust. ESB fyrirhugar að fjölga geirum sem heyra undir ETS kerfið á næstu árum og því áríðandi að skerpa verulega á nálgun stjórnvalda hvað varðar vinnulag og gagnsæi í kringum ETS kerfið.

Í ályktun hópsins kemur fram sameiginlegt ákall um að íslensk stjórnvöld styðji við atvinnulífið með því að vera sterkari rödd varðandi þróun og umsýslu ETS-kerfisins. Ályktunin er í þremur liðum:

Aukin hagsmunagæsla á evrópskum vettvangi
Breytingar á almennum reglum ETS í stað undanþága
Aukið gagnsæi um tekjur og ráðstöfun fjármuna

Loftslagsleiðtogar Festu eru hópur forstjóra stærstu fyrirtækja landsins sem vilja sýna fordæmi í loftslagsmálum og kalla jafnframt eftir auknu samtali við stjórnvöld um sameiginlega vegferð í átt að settu marki. Hópurinn hittist reglulega á vegum Festu og fræðist um tengingar atvinnulífs og loftslagsmála. Í kjölfar síðasta fundar Loftslagsleiðtogahópsins þar sem þátttakendur fengu góða kynningu á ETS kerfinu frá Hrafnhildi Bragadóttur, sérfræðingi í umhverfislögfræði, sammæltist hópurinn um þessi þrjú megin atriði sem þyrfti að bæta úr hið fyrsta.

Með aukinni áherslu á þessa þætti mætti tryggja meiri sátt um kerfið, sinna betur nauðsynlegri hagsmunagæslu og blása nýju lífi í aðgerðir til að draga úr losun.

Hópurinn er tilbúinn í samtalið.

Ályktunina í heild má lesa hér .

Eiríkur Hjálmarsson kosinn í stjórn Festu

Wed, 27 May 2026 08:36:47 GMT

Aðalfundur Festu fór fram í gær – Ársskýrsla 2025 komin út

Stjórn Festu, frá vinstri: Erla Ósk Ásgeirsdóttir, formaður, Bryndís Björk Ásgeirsdóttir, Anton Sigfússon, Reynir Smári Atlason, María Rúnarsdóttir, Hlédís Sigurðardóttir, Eiríkur Hjálmarsson, Bjarni Már Gylfason, varaformaður og Elva Rakel Jónsdóttir, framkvæmdastjóri.

Á Aðalfundi Festu, miðstöð um sjálfbærni, sem fór fram í Háskólanum í Reykjavík í gær var Eiríkur Hjálmarsson, sjálfbærnistjóri Orkuveitunnar, kosinn nýr í stjórn Festu. Eiríkur býr yfir víðtækri reynslu og þekkingu af vinnu tengdri sjálfbærnimálum síðustu áratugi og því mikill fengur fyrir Festu að fá hann til liðs við stjórnina. Auk hans voru Bjarni Már Gylfason frá Rio Tinto á Íslandi og María Rúnarsdóttir frá Heimum endurkjörin til næstu tveggja ára.

“Í mínum huga er Festa einstakt forystuafl í því brýna verkefni að búa afkomendum okkar lífvænlega framtíð. Það er með mikilli tilhlökkun að ég tek sæti í stjórn Festu – þessu landsliði sjálfbærninnar – til að vinna að og hvetja til áframhaldandi framfara í sjálfbærum rekstri fyrirtækja í landinu” segir Eiríkur.

Í stjórn Festu sitja fulltrúar sjö aðildarfélaga, auk fulltrúa frá Háskólanum í Reykjavík þar sem skrifstofa Festu er staðsett. Formaður er Erla Ósk Ásgeirsdóttir, stjórnarkona í Bláa lóninu og varaformaður er Bjarni Már Gylfason frá Rio Tinto á Íslandi. Aðrir stjórnarmeðlimir eru Reynir Smári Atlason (Creditinfo), Anton Sigfússon (Hagar), Hlédís Sigurðardóttir (Arion Banki), María Rúnarsdóttir (Heimar) og Bryndís Björk Ásgeirsdóttir frá Háskólanum í Reykjavík. Rakel Eva Sævarsdóttir frá Trail sjálfbærniráðgjöf lauk fjögurra ára stjórnarsetu á fundinum og þakkar Festa henni kærlega fyrir ómetanlegt framlag til félagsins síðustu ár.

Ársskýrsla Festu komin út

Á Aðalfundinum var farið yfir ársreikning Festu og breytingar á samþykktum félagsins voru kynntar og samþykktar . Samhliða fundinum kom út ársskýrsla Festu fyrir árið 2025 þar sem lesa má um fjölbreytt verkefni félagsins og þá ótal viðburði sem Festa og aðildarfélög skipulögðu eða tóku þátt í á árinu.

Sjálfbærni er í dag lykilatriði þegar kemur að samkeppnishæfni, áhættustýringu og samkeppnishæfni fyrirtækja. Á árinu hélt Festa áfram að tengja saman atvinnulíf, stjórnvöld og stofnanir og styðja við aðildarfélög í að gera sjálfbærni að raunverulegum hluta af rekstrinum. Festa fagnar 15 ára afmæli í ár og horfir fram á veginn með skýra trú á að ákvarðanir dagsins í dag móti samkeppnishæfni og samfélag morgundagsins.

Lesa má ársskýrslu og skoða ársreikning hér.

Frá hugmynd til hringrásar

Fri, 22 May 2026 08:52:16 GMT

Lærdómur Emblu Medical frá Nordic Circular Design Programme

„Það sem við lærðum hvað mest er að hugsa ekki um sjálfbærni eða hringrás eftir á, heldur alveg frá byrjun og sem hluta af rekstrinum. Með því að endurnýta hráefni í stað þess að kaupa alltaf ný getum við bæði dregið úr notkun auðlinda og lækkað kostnað”, segir Kristín Birna Birnisdóttir, verkfræðingur, sem starfar við nýsköpun í þróunarteymi Emblu Medical/Össur.

Kristín, og hópur starfsmanna Emblu Medical, tók í vetur þátt í Nordic Circular Design Programme, sex mánaða norrænu fræðslu- og þróunarverkefni sem styður fyrirtæki við að innleiða hringrásarhugsun í vöruþróun og rekstur. Verkefnið er leitt af samtökunum Ethica í Finnlandi í samstarfi við Nordic Innovation, Cradlenet í Svíþjóð, Norwegian Centre of Circular Economy í Noregi, Dansk Design Center í Danmörku og Festu á Íslandi. Í byrjun maí komu fulltrúar fyrirtækjanna saman í Asker í Noregi á uppskeruhátíð verkefnisins til að kynna sína vegferð.

Teymi Emblu skoðaði hvort endurnýta mætti hluta úr gervifótum, sem hafa annað hvort runnið út á tíma eða eru hættir í notkun, í stað þess að þeim sé fargað. Þegar aðgengi að hráefnum verður takmarkað, til dæmis vegna verðhækkana eða truflana í aðfangakeðjum, getur hringrásarhugsun dregið úr áhættum og skapað viðskiptalegt virði.

„Aðgangur að hráefnum eins og áli og títaníum er ekki endalaus og þetta verður sérstaklega mikilvægt þegar hráefnisverð hækkar. Þá þarf að nýta þau efni sem þegar eru til staðar eins vel og hægt er”, segir Kristín. Að hennar sögn snýst þetta ekki aðeins um umhverfisáhrif heldur einnig um viðskiptaleg og samfélagsleg áhrif. Ef það er hægt að lækka kostnað á vörum með því að endurnýta hráefnin gæti Embla Medical gert vörurnar aðgengilegri fyrir fleiri sem þurfa stoðtæki til að lifa sjálfstæðu og virku lífi. Þannig getur hringrásarhugsun opnað tækifæri til ná til fleiri notenda.

„Það sem kom okkur síðan kannski mest á óvart var að þegar við skoðuðum okkar eigin vörur kom í ljós að þær pössuðu betur inn í hringrásarhagkerfið en við höfðum gert ráð fyrir. Þó að vörurnar hafi ekki upphaflega verið hannaðar með hringrásarhugsun í huga fyrir 10-15 árum síðan, þá reyndust þær vera mun „hringrásarvænni“ en við bjuggumst við,” segir Kristín. Þetta sýnir að oft er hægt að byggja áfram á núverandi lausnum með markvissum breytingum, frekar en að byrja frá grunni.

„Þegar ólík sjónarhorn koma saman verða lausnirnar betri”

Átta fyrirtæki úr ólíkum áttum tóku þátt í verkefni Nordic Circular Design Programme sem skapaði vettvang fyrir fyrirtæki úr ólíkum geirum til að læra hvert af öðru.

„Það var mjög dýrmætt að kynnast öðrum fyrirtækjum sem eru að glíma við svipaðar áskoranir. Það skapaðist mikill samhugur og vilji til að deila reynslu og þekkingu,“ segir Kristín. Hún bætir við að einn stærsti ávinningurinn hafi verið að verkefnið kallaði fleiri teymi fyrirtækisins að borðinu. Verkefnið var því ekki bundið við einn hóp, heldur varð það sameiginlegt verkefni með þátttöku frá þróunar-, sölu, markaðs- og framleiðsluteymum. „Þegar ólík sjónarhorn koma saman verða lausnirnar betri,” segir Kristín. Hún bætir við að þessi nálgun hafi leitt til betri heildarsýnar á verkefnið og að lærdómurinn geti nýst í að þróa lausnir sem hægt er að skala yfir á fleiri stoðtæki.

„Við höfum lært gríðarlega mikið og myndum mæla með þessu fyrir fyrirtæki á öllum stigum í sinni vegferð. Ég held að þetta sé bara byrjunin á einhverju miklu meira,“ segir Kristín og segir að lokum að hringrásarhugsun muni án efa verða sífellt stærri hluti af starfsemi fyrirtækisins.

Festa mun áfram styðja við aðildarfélög sín í þeirri vegferð með því að skapa vettvang fyrir áframhaldandi samtal og samstarf fyrirtækja sem vilja innleiða hringrásarhugsun í vöruþróun sína. Nú er opið fyrir umsóknir í næstu umferð Nordic Circular Design Programme og áhugasöm fyrirtæki geta kynnt sér ferlið hér .

ETS-kerfið útskýrt

Mon, 16 Mar 2026 15:29:41 GMT

Ákall um skýrari umræðu um loftslagsaðgerðir

Það var gríðargóð mæting á fræðslufund Festu um ETS-kerfið í síðustu viku, DÝPKUN: Allt sem þú þarft að vita um ETS-kerfið . Þar komu saman fulltrúar úr ólíkum geirum atvinnulífsins, auk ríkisstofnana og ráðuneyta, til að hlusta á Hrafnhildi Bragadóttur, umhverfislögfræðing og einn helsta sérfræðing Íslands í ETS-kerfinu, ræða kerfið og skuldbindingar Íslands í loftslagsmálum. Á fundinum var farið yfir regluverk ETS-kerfisins, stöðu Íslands og þær oft á tíðum misvísandi upplýsingar sem hafa verið á sveimi um kerfið í opinberri umræðu. Við þökkum öllum sem mættu og tóku þátt í þessu mikilvæga samtali!

Umræðan um ETS-kerfið hefur verið áberandi undanfarið og ekki að ástæðulausu, enda er kerfið flókið, í sífelldri þróun og ekki gallalaust. Nokkur upplýsingaóreiða hefur þó verið í kringum kerfið og því mikilvægt að staldra við og ræða málið með því að lyfta upp staðreyndum og horfa á heildarmyndina. Eitt af hlutverkum Festu er einmitt að skapa öruggan vettvang fyrir upplýsta umræðu um flókin málefni þar sem ólík sjónarmið fá að mætast.

Hrafnhildur tók þátt í innleiðingu kerfisins hér á landi og hún gaf því verðmæta innsýn í sögu og virkni kerfisins af yfirvegun og miklum skýrleika. Hún benti meðal annars á að Ísland tekur nú þegar þátt í ýmsum kerfum Evrópusambandsins í loftslagsmálum og umhverfismál eru hluti af EES samningnum. ETS-kerfið er eitt af þeim kerfum með þann megintilgang að skapa hvata til að draga úr losun og þar með skaðlegum áhrifum loftslagsbreytinga. Kerfinu er ætlað að styðja við mengunarbótaregluna, það er, að sá sem mengar greiði fyrir afleiðingar mengunarinnar. Með því að losunarheimildir verði smám saman dýrari er markmiðið því að það verði fjárhagslega hagkvæmara fyrir fyrirtæki að draga úr losun en að greiða fyrir hana. Á sama tíma skapar kerfið tekjur sem renna meðal annars í nýsköpunarsjóði og til ríkissjóða. Þeir fjármunir eiga að styðja við þróun nýrrar tækni og uppbyggingu innviða sem hjálpa fyrirtækjum að draga úr losun.

Í umræðunum kom einnig fram að mikilvægt væri að stjórnvöld auki gagnsæi og bæti aðgengi að upplýsingum um loftslagsmál. Skýrari upplýsingagjöf og betra samhengi milli tekna ríkisins af kerfum eins og ETS og fjárfestinga í loftslagsaðgerðum gæti aukið skilning og stuðning við aðgerðir bæði hjá almenningi og atvinnulífi.

Nokkur lykilatriði stóðu upp úr í samtalinu hjá okkur:

Að draga úr losun er verkefni dagsins í dag og krefst samvinnu atvinnulífs og stjórnvalda. Það verkefni hverfur ekki þó umræðan um útfærslur ETS-kerfisins breytist.
Mikilvægt er að tengja tekjur ríkisins af kerfum eins og ETS við fjárfestingu í innviðum og lausnum sem auðvelda fyrirtækjum að draga úr losun.
Þörf er á skýrari umræðu um samfélagslegan kostnað losunar, því ef sá sem mengar borgar hann ekki, hver gerir það þá?

Við erum gríðarlega ánægð með vel heppnaðan fund sem sýndi að áhugi á málefninu er mikill og þörf er á að halda samtalinu áfram á grundvelli staðreynda og heildarsýnar frekar en skammtímahagsmuna.

DÝPKUN er nú fræðslufundaröð Festu þar sem þátttakendur fá rými til að hlýða á sérfræðing útskýra flókin kerfi og lykilhugtök af meiri dýpt með opnu samtali fyrir spurningar og umræður í lokin.

Umbreyting hefst hjá einstaklingum og byrjar á einni ákvörðun

Mon, 02 Feb 2026 15:33:03 GMT

Vel heppnuð Janúarráðstefnu Festu á föstudag

Umbreyting þarf ekki að vera viðbragð við ótta eða óöryggi, heldur meðvituð ákvörðun um að skapa ný tækifæri fyrir framtíðina. Þetta var meginboðskapur Janúarráðstefnu Festu 2026, sem fór fram í fullum sal í Silfurbergi Hörpu síðasta föstudag. Við opnun ráðstefnunnar benti Elva Rakel Jónsdóttir, framkvæmdastýra Festu á, að umbreyting er óhjákvæmileg í breyttum heimi og hvatti ráðstefnugesti til að rækta ímyndunaraflið, hugrekkið og viljann til aðgerða. Það var ekki annað að heyra eftir að ráðstefnunni lauk en að þessi skilaboð hefðu fengið góðan hljómgrunn.

Festa, miðstöð um sjálfbærni, fagnar 15 ára afmæli á þessu ári, og hefur frá stofnun verið vettvangur fyrir samtal, samvinnu og nýja sýn um sjálfbæra þróun í íslensku atvinnulífi og samfélagi. Á ráðstefnunni í ár var horft bæði til alþjóðlegrar og íslenskrar reynslu af stórum samfélagslegum umbreytingum og spurt hvað við getum lært af þeim.

Jákvæðir vendipunktar - þegar samfélög taka stökk

Á meðal fyrirlesara var prófessor Tim Lenton, einn helsti loftslagsvísindamaður heims í dag. Hann fjallaði um svokallaða jákvæða vendipunkta (e. positive tipping points) og hvernig tækniframfarir, orkuskipti og endurvakin tengsl við náttúruna geti snúið neikvæðri þróun í jákvæða. Lenton líkti umbreytingum samfélaga við söguleg stökk, allt frá skiptum hestvagna yfir í bíla til baráttu kvenna fyrir kosningarétti, þar sem það sem eitt sinn þótti óhugsandi varð að normi og til þess þurfti virka þátttöku samfélagsins. Hann benti jafnframt á alvarlega stöðu Golfstraumsins og mikilvægi þess að bregðast við áður en óafturkræfir vendipunktar nást. „Við getum þetta. Við verðum að gera þetta. En það krefst skuldbindingar nægilega stórs hóps til að færa okkur frá hamförum yfir í velsæld,“ sagði Lenton.

Sagnfræðingurinn Stefán Pálsson setti umræðuna einnig í sögulegt samhengi með lifandi frásögn af hitaveituvæðingu Íslands, einu stærsta umbreytingarverkefni Íslandssögunnar, þar sem tilviljunakennd atburðarrás við að nýta jarðhita til að hita upp laug til sundkennslu breytti lífsgæðum, heilbrigði og efnahag samfélagsins. Sú reynsla er enn nýtt í dag og íslenskar orkulausnir ná nú langt út fyrir landsteinana, meðal annars í gegnum Jarðhitaskóla GRÓ, Arctic Green Energy og alþjóðlegt samstaf, eins og kom fram í erindi Birtu Kristínar Helgadóttur hjá Íslandsstofu. Birta lagði áherslu á að raunverulegt forskot Íslands lægi í reynslu okkar af umbreytingu og að halda áfram að þora: „Umbreyting hefst hjá fólki og ef við viljum raunverulegar breytingar þurfum við að fjárfesta í fólki, færni og hugrekki,“ sagði Birta.

Þessi alþjóðlegu áhrif Íslands voru einnig dregin fram í erindi nýsköpunarstjóra Íslenska sjávarklasans, Benedek Regoczi, sem fjallaði um 100% nýtingu sjávarauðlinda og hvernig Ísland geti haft áhrif og hraðað sjálfbærri verðmætasköpun í sjávarútvegi.

Umbreyting stjórnsýslu, matvælakerfa og byggingariðnaðar

Í erindum sínum drógu Luukas Ilves, Deniz Koca og Arnhildur Pálmadóttir upp skýra framtíðarsýn um hvernig umbreyta megi grunnkerfum samfélagsins til að mæta áskorunum samtímans, allt frá stjórnsýslu og matvælum til byggingariðnaðar.

Luukas Ilves, sérfræðingur í stafrænni umbreytingu, fjallaði um hvernig gervigreind og stafræn tækni geti umbreytt stjórnsýslu og opinberri þjónustu ef hún er notuð af ábyrgð og lýsti framtíðarsýn þar sem ríkið yrði skilvirkari, sveigjanlegri og mannúðlegri þjónustuaðili. Deniz Koca fjallaði um flókið eðli matvælakerfa og benti á að matvælaframleiðsla beri ábyrgð á um þriðjungi allrar losunar gróðurhúsalofttegunda, að stórum hluta vegna landnotkunar. Hann lagði áherslu á að vannæring og matvælaóöryggi væru raunveruleg vandamál en að hægt væri að umbreyta kerfum og gera matvælaframleiðslu heimsins sjálfbærari, en þá þyrftu allir að vera með.

Í mannvirkjagerð og byggingariðnaði kallaði Arnhildur Pálmadóttir eftir hraðari umbreytingu og uppfærslu mengandi og gamaldags kerfa. Hún benti á að hraðar breytingar hafi átt sér stað á Íslandi en að kerfin þurfi að þróast hraðar. Meðal lykilatriða séu að draga úr efnisnotkun, endurnýta byggingarefni, minnka kolefnisspor og takmarka úrgang. „Arkitektúr getur haft áhrif. Við þurfum að þora að gera umbreytingu á kerfum sem eru ekki að virka,“ sagði Arnhildur meðal annars.

Félagslegir vendipunktar og hugrekki einstaklinga

Að lokum var fjallað um félagslega vendipunkta og hlutverk einstaklinga og fyrirtækja í að knýja fram breytingar. Ragga Nagli minnti á að raunveruleg umbreyting felist ekki síst í breytingu á sjálfsmynd og hegðun og að hin minnsta mótstaða geti orðið til þess að við gefumst upp áður en ný venja festist í sessi. Síðasti fyrirlesari dagsins var danski arkitektinn og aktívistinn Kasper Benjamin Reimer Björkskov sem fjallaði um félagslega vendipunkta, norm og “bystander-áhrif” og mikilvægi þess að bíða ekki eftir að einhver annar taki frumkvæðið. Hann skildi ráðstefnugesti eftir hugsi þegar hann sagði: „Ein hugrökk athöfn, eitt samtal eða ein færsla á samfélagsmiðlum getur sett af stað keðjuverkun sem breytir kerfum. Segðu eitthvað. Jafnvel þótt röddin skjálfi.“

Janúarráðstefna Festu 2026 undirstrikaði þannig mikilvægi þess að líta ekki undan heldur taka þátt í umbreytingunni. Tækifærin eru til staðar til að endurhanna kerfi, nýta tækni af ábyrgð og byggja samfélag sem er sjálfbærara, réttlátara og betur í stakk búið fyrir framtíðina. Elva Rakel kjarnaði þetta í lok ráðstefnunnar þegar hún sagði að við þyrftum að horfa á stóru myndina, treysta þeim krafti og orku sem var til staðar í Silfurbergi og þora að taka þátt: „Umbreytingin er þegar hafin. Það er undir okkur komið hvort við sitjum við borðið eða verðum á matseðlinum,“ sagði Elva Rakel Jónsdóttir, framkvæmdastýra Festu, að lokum.

Styrktaraðilar ráðstefnunnar voru Bláa lónið, Húsasmiðjan og Íslandshótel og þakkar Festa þeim innilega fyrir stuðninginn. Þessi fyrirtæki gera Festu kleift að bjóða uppá fjölbreytta dagskrá með erlendum gestum.

Fyrsta ungmennaráð Festu

Sat, 31 Jan 2026 10:30:02 GMT

"Ö flugur vettvangur fyrir áhrifaríkt samtal um sjálfbærnimál"

Fyrsta ungmennaráð Festu, miðstöðvar um sjálfbærni, var kynnt á Janúarráðstefnu Festu sem fór fram í Silfurbergi Hörpu í gær. Stofnun ráðsins markar mikilvæg tímamót í 15 ára sögu Festu og er liður í því að efla enn frekar þátttöku ungs fólks í sjálfbærnistarfi á Íslandi. Í ungmennaráði Festu sitja 12 einstaklingar á aldrinum 18 - 28 ára, sem starfa hjá aðildarfélögum Festu og eiga það sameiginlegt að hafa brennandi áhuga á sjálfbærni og samfélagsmálum . Ráðið mun gegna mikilvægu hlutverki við að færa nýja sýn og rödd ungs fólks inn í starf Festu til að styðja við áframhaldandi umbreytingu í íslensku atvinnulífi og samfélagi.

„Ég hef brennandi áhuga á því hvernig nýsköpun, tækniþróun og sjálfbærni geta stutt hvert annað og leitt til aukins árangurs í sjálfbærnivegferðinni okkar. Með þátttöku í ungmennaráði Festu vil ég efla þátttöku ungs fólks með ólíkan bakgrunn og styrkja tengsl á milli ólíkra hópa. Ég hlakka til að leggja mitt af mörkum til að efla sjálfbærnihugsun og skapa ný tækifæri í íslensku nýsköpunarumhverfi,“ segir Júlía Huang, sérfræðingur í sjálfbærni hjá Arion banka.

„Ég bauð mig fram í ungmennaráð Festu vegna þess að þetta er öflugur vettvangur fyrir áhrifaríkt samtal um sjálfbærnimál, þar sem að hægt er að hafa raunveruleg áhrif. Meðlimirnir koma úr ólíkum áttum en taka þátt í starfinu á sömu forsendum. Ég hef þess vegna fulla trú á að slíkur hópur geti unnið að spennandi verkefnum. Ég vona að við sem hópur munum hafa jákvæð áhrif sem víðast út í samfélagið með því að lyfta upp þeim jákvæða ávinningi sem felst í sjálfbærni,“ segir Alda Marín Jóhannsdóttir, fulltrúi hjá Umhverfis-, orku- og loftslagsráðuneytinu.

Raddir ungs fólks þurfa aukið vægi í ákvarðanatöku

Með stofnun ungmennaráðsins vill Festa tryggja að raddir og hugmyndir ungs fólks fái aukið vægi í ákvarðanatöku um sjálfbærni og þá samfélagslegu umbreytingu sem nauðsynleg er fyrir komandi kynslóðir. Meðlimir ráðsins sameinast í því að vilja læra hvert af öðru, hafa áhrif og brúa bilið milli kynslóða, stefnumótunar og framkvæmdar og vonast þau til að geta hvatt fyrirtæki og stjórnvöld til að taka ákvarðanir með sjálfbæra framtíð að leiðarljósi.

„Ungt fólk mun lifa lengst með þeim ákvörðunum sem teknar eru í dag í sjálfbærnimálum. Þess vegna skiptir máli að rödd okkar fái að heyrast í stefnumótun til framtíðar, segir Jón Gunnarsson, verkefnastjóri hjá Samorku og meðlimur ungmennaráðsins. „Sjálfbær orkuskipti skipta mig mestu máli í dag. Þau eru án efa mikilvægasta verkefni sem Ísland stendur frammi fyrir, hvort sem litið er til efnahags, umhverfis eða þjóðaröryggis. Ísland hefur einstaka stöðu með 100% endurnýjanlega raforku, en næstu skref verða krefjandi og kalla á skýra framtíðarsýn, ábyrga uppbyggingu orkuinnviða og markvissa umræðu á opinberum vettvangi,“ segir Jón.

Ungmennaráð Festu vill leggja sitt af mörkum til að tryggja að sjálfbær umbreyting verði ekki aðeins umræðuefni heldur framkvæmd í verki, og að ungt fólk fái sæti við borðið. Festa er afar stolt af þessum öfluga hópi og hlakkar til samstarfsins framundan.

Ljósmynd: Ernir Eyjólfsson

Á myndinni eru: Helga Margrét Óskarsdóttir - Fulltrúi í tjóna- og forvarnarmálum hjá Eimskip, Júlía Huang - Sérfræðingur í sjálfbærni hjá Arion banka, Jóhanna Sól Erlendsdóttir - Sérfræðingar í sjálfbærni hjá Heimum, Ólöf Helga Þórmundsdóttir - Starfsmaður í Vörustjórnun hjá 66 Norður, Alda Marín Jóhannsdóttir, fulltrúi í Umhverfis-, orku- og loftslagsráðuneytinu, Guðni Þór Þórisson - Sérfræðingur í sjálfbærniráðgjöf hjá Deloitte, Jóna Rut Vignir - Sérfræðingur í stefnumótun og sjálfbærni hjá Íslandsbanka, Jón Gunnarsson - Verkefnastjóri greininga hjá Samorku, Pétur Melax – Sölustjóri hjá Bónus og Sara Júlía Baldvinsdóttir - Sérfræðingur í sjálfbærni hjá KPMG.

Á myndina vantar Rakel Söru Magnúsdóttur, vörustjóra hjá Elko og Kristjönu Mist Logadóttur, sérfræðing í markaðsteymi Advania.

“Heimurinn er að breytast og við þurfum að breytast með.”

Tue, 27 Jan 2026 09:29:05 GMT

Janúarráðstefna Festu á föstudaginn

Janúarráðstefna Festu fer fram í Silfurbergi Hörpu á föstudaginn, 30. janúar. Um er að ræða stærsta árlega viðburð landsins sem snýr að sjálfbærnimálum. Þema ráðstefnunnar í ár er ,Umbreyting er ákvörðun, sem er sérstaklega aðkallandi vegna stöðu alþjóðamála sem felst meðal annars í geópólitískri óvissu, áhrifum loftslagsbreytinga, örri tækniþróun og samfélagslegum áskorunum sem kalla á raunhæfar og markvissar leiðir til umbreytingar meðal fyrirtækja, stofnana og almennings.

„Heimurinn er að breytast og við þurfum að breytast með," segir Elva Rakel Jónsdóttir, framkvæmdastýra Festu. „Þegar óvissa í alþjóðamálum sameinast sviptingum á markaði og allt er borið fram á smörrebrauði loftslagsbreytinga þá getum við ekki leikið sama leikinn og haldið að áhrifin verði óbreytt. Við þurfum umbreytingu, því stöðnun virkar ekki,“ segir Elva.

Fjölbreytt dagskrá með alþjóðlegum og innlendum sérfræðingum

Janúarráðstefna Festu hefur verið haldin árlega síðan 2013 og hefur fest sig í sessi sem mikilvægur og lifandi vettvangur fyrir samræður, nýja sýn og innblástur um sjálfbærni í atvinnulífi og samfélagi. Á Janúarráðstefnunni leiðir Festa saman íslenska og erlenda fræðimenn, frumkvöðla og skapandi hugsuði sem munu deila umbreytingarsögum úr ólíkum geirum atvinnulífsins. Dagskráin spannar meðal annars loftslagsvísindi, nýsköpun í atvinnulífi, matvælaframleiðslu, tækni, félagslega sjálfbærni, menningu, sögu, húmor og persónulega reynslu. Meðal fyrirlesara eru:

Tim Lenton , einn fremsti loftslagssérfræðingur heims mun kynna brautryðjendarannsóknir sínar á jákvæðum vendipunktum sem geta hraðað umbreytingu í átt að markmiðum Parísarsáttmálans;
Luukas Ilves , sérfræðingur í gervigreind og stafrænni stefnumótun og ráðgjafi stjórnvalda í Úkraínu og Eistlandi, deilir reynslu af stafrænni byltingu, í friði jafnt sem átökum;
Birta Kristín Helgadóttir , mun meðal annars ræða hvernig íslenskar orkulausnir geta lagt sitt að mörkum til að mæta alþjóðlegum orkuskorti;
Deniz Koca kynnir nýjar aðferðir til að tryggja matvælaöryggi í heiminum;
Arnhildur Pálmadóttir og Benedek Regoczi munu sýna hvernig nýsköpun í hönnun og auðlindanýtingu geta ýtt undir raunverulegar breytingar innan sjávarútvegs og byggingariðnaðarins og stuðlað að sjálfbærri verðmætasköpun;
Kasper Bjørkskov, Ragga Nagli og Stefán Pálsson munu síðan setja umbreytingu í samfélagslegt, mannlegt og sögulegt samhengi.

Að auki munu þjóðþekktir einstaklingar mætast á sviðinu í svokölluðu „Trúnó-samtali“ og ræða út fyrir boxið um þema ráðstefnunnar, meðal annars Páll Óskar, Halldóra Geirharðsdóttir, Katrín Jakobsdóttir og Bogi Ágústsson.

15 ára afmæli Festu og nýtt ungmennaráð kynnt á Janúarráðstefnunni

Festa, miðstöð um sjálfbærni, fagnar 15 ára afmæli í ár og af því tilefni verður fyrsta Ungmennaráð Festu kynnt til sögunnar á ráðstefnunni. Markmiðið með ungmennaráðinu er að tryggja að raddir og hugmyndir ungs fólks fái aukið vægi í að efla sjálfbærni í íslensku samfélagi og þeirri umbreytingu sem þörf er á fyrir komandi kynslóðir.

„Framtíðin er óráðin, sem þýðir að við höfum enn öll heimisins tækifæri til að móta hana eins og við viljum hafa hana. Aukið jafnrétti, aukin sjálfbærni, aukin gróska og nýsköpun, allt er þetta innan seilingar ef við bara tökum ákvörðun og setjum stefnuna,“ segir Elva Rakel og bætir við: „Umbreyting gerist ekki af sjálfu sér, hún er ákvörðun sem við verðum að taka. Í gegnum umbreytingu birtist trú okkar á að við getum skapað betra samfélag með fjölbreyttum viðskiptatækifærum og öflugri nýsköpun með hag náttúru og velsældar fyrir augum.”

Með ráðstefnunni vill Festa beina kröftum atvinnulífs, háskóla og stjórnvalda í samtaka vegferð um umbreytingu og hvetur Festa öll sem koma á Janúarráðstefnuna til að gefa sér leyfi til að taka stökkið og byrja.

„Við hér á Íslandi höfum sterka trú á því að einstaklingar geti haft áhrif, sem sést á því hvað við, sem lítil þjóð, höfum gert margt stórkostlegt. Það er þessi kraftur sem við vonumst til að leysa úr læðingi á Janúarráðstefnu Festu. Krafturinn til að ekki bara hugsa eftir nýjum brautum heldur framkvæma í takt við nýja tóna, sigla á ný mið og fagna tækifærinu sem felst í umbreytingunni,” segir Elva að lokum.

Hægt er að kynna sér dagskrá ráðstefnunnar og kaupa miða hér: https://www.sjalfbaer.is/vidburdir/janfest2026

Styrktaraðilar ráðstefnunnar eru Bláa lónið, Húsasmiðjan og Íslandshótel og þakkar Festa þeim innilega fyrir stuðninginn. Þessi fyrirtæki gera Festu kleift að bjóða uppá fjölbreytta dagskrá með erlendum gestum.

Umbreyting er ákvörðun

Thu, 08 Jan 2026 01:28:02 GMT

Janúarráðstefna Festu 2026

Janúarráðstefna Festu er stærsti árlegi sjálfbærniviðburður á Íslandi og fer fram í Silfurbergi Hörpu föstudaginn 30. janúar 2026, undir yfirskriftinni Umbreyting er ákvörðun. Ráðstefnan hefur verið haldin árlega síðan 2013 og hefur fest sig í sessi sem einn mikilvægasti og líflegasti vettvangur landsins fyrir samræður, nýja sýn og innblástur um sjálfbærni í atvinnulífi og samfélagi.

Þema ráðstefnunnar í ár, umbreyting, á sérstaklega vel við í dag þar sem geópólitísk óvissa, loftslagsbreytingar, hröð tækniþróun og samfélagslegar áskoranir kalla á raunhæfar leiðir til umbreytingar meðal fyrirtækja, stofnana og almennings. En umbreyting gerist ekki af sjálfu sér, hún felur í sér ákvörðun um að trúa á framtíðina og snertir alla þætti sjálfbærni. Á Janúarráðstefnunni leiðir Festa saman brautryðjendur, sérfræðinga og skapandi hugsuði, innlenda jafnt sem erlenda, sem deila raunverulegum umbreytingarsögum úr ólíkum geirum atvinnulífsins. Ráðstefnan dregur fram hvernig breytingar sem þegar hafa tekist vel geta orðið öðrum innblástur, hvort sem um er að ræða fyrirtæki, stofnanir eða einstaklinga.

Fjölbreytt dagskrá með alþjóðlegum og innlendum fyrirlesurum

Dagskrá ráðstefnunnar spannar fjölbreytt sjónarhorn á umbreytingu, þar á meðal loftslagsvísindi, nýsköpun í atvinnulífi, matvælaframleiðslu, tækni, félagslega sjálfbærni, menningu, sögu, húmor og persónulega reynslu.

Meðal fyrirlesara eru:

Tim Lenton , einn fremsti loftslagssérfræðingur heims og höfundur bókarinnar Positive Tipping Points: How to Fix the Climate Crisis, mun meðal annars kynna brautryðjendarannsóknir sínar á jákvæðum vendipunktum sem geta hraðað umbreytingu í átt að markmiðum Parísarsáttmálans;
Luukas Ilves , sérfræðingur í gervigreind og stafrænni stefnumótun og ráðgjafi stjórnvalda í Úkraínu og Eistlandi, deilir reynslu af stafrænni byltingu, í friði jafnt sem átökum. Hann hefur meðal annars hlotið friðarverðlaun Úkraínu fyrir störf sín til stuðnings Úkraínu eftir allsherjarinnrás Rússlands;
Birta Kristín Helgadóttir , mun meðal annars ræða hvernig ískenskar orkulausnir geta lagt sitt að mörkum til að mæta alþjóðlegum orkuskorti og hraðað sjálfbærri umbreytingu;
Deniz Koca kynnir nýjar aðferðir til að tryggja matvælaöryggi í heiminum þar sem réttar ákvarðanir á réttum stað geta knúið fram kerfisumbreytingar;
Arnhildur Pálmadóttir og Benedek Regoczi munu sýna hvernig nýsköpun í hönnun og auðlindanýtingu geta ýtt undir raunverulegar breytingar innan sjávarútvegs og byggingariðnaðarins og stuðlað að sjálfbærri verðmætasköpun;
Kasper Bjørkskov, Ragga Nagli og Stefán Pálsson munu síðan setja umbreytingu í samfélagslegt, mannlegt og sögulegt samhengi.

Að auki verða hin svokölluðu Trúnó-pör á sínum stað, þar sem áhrifafólk úr ólíkum áttum ræðir þema ráðstefnunnar á einlægan og opinn hátt. Þá munu íslensk fyrirtæki einnig deila reynslu sinni af félagslegri umbreytingu í verki.

EN-ROADS vinnustofa sem sérstakur kaupauki

Í fyrsta sinn býður Festa upp á gagnvirka vinnustofu með EN-ROADS loftslaghermilíkaninu sem sérstakan kaupauka fyrir þau fyrstu sem tryggja sér miða. EN-ROADS var þróað af MIT-háskóla og Climate Interactive og er notað víða um heim af leiðtogum í stjórnmálum, atvinnulífi og menntakerfi til að efla gagnreynda umræðu og ákvarðanatöku í loftslagsmálum.

Formleg dagskrá Janúarráðstefnunnar lýkur kl.16:00, en í kjölfarið geta gestir skálað og skemmt sér saman í lok dags þar sem DJ Sigrún Skafta sér um tónlistina.

Miðasala er hafin og hægt er að tryggja sér miða hér .

Styrktaraðilar ráðstefnunnar eru Íslandshótel, Húsasmiðjan og Bláa lónið og þökkum við þeim innilega fyrir stuðninginn!

Umsóknir óskast í nýtt Ungmennaráð Festu

Mon, 24 Nov 2025 13:27:07 GMT

Við leitum að áhugasömu ungu fólki á aldrinum

18 - 28 ára sem starfar hjá aðildarfélögum Festu.

Ungt fólk gegnir lykilhlutverki í mótun sjálfbærrar framtíðar og mikilvægt að raddir þeirra fái að heyrast, í samfélagsumræðu og í atvinnulífinu. Til að styrkja þátttöku ungs fólks er Festa - miðstöð um sjálfbærni, að setja á laggirnar nýtt Ungmennaráð Festu. Við óskum eftir umsóknum frá áhugasömu starfsfólki aðildarfélaga Festu á aldrinum 18–28 ára sem hefur áhuga á að taka þátt og leggja sitt af mörkum til að efla sjálfbærni í samfélaginu. Umsóknarfrestur er til 15. desember 2025.

Hlutverk Ungmennaráðs Festu

Ungmennaráð Festu mun gegna mikilvægu hlutverki við að færa nýja sýn, ferska hugsun og rödd ungs fólks inn í starf Festu. Helstu verkefni þess verða:

Áheyrnarfulltrúi í stjórn Festu: Einn fulltrúi ráðsins situr mánaðarlega stjórnarfundi Festu.
Rýnihópur fyrir viðburði Festu: Ráðið veitir innsýn og umsagnir um efnistök, miðlun og þróun nýrra viðburða.
Samráð um samfélagsmiðlanotkun Festu: Ungmennaráðið gefur ráðleggingar um efni og framsetningu sem höfðar til yngri kynslóða.
Þátttaka í viðburðum Festu: Fulltrúar ráðsins taka þátt í viðburðum eftir hentugleika, meðal annars með erindi á Janúarráðstefnu Festu, og fá stuðning til að skipuleggja eigin viðburði.

Hvernig fer ferlið fram?

Við biðjum um:

Stutta lýsingu á umsækjanda (aldur, menntun og hlutverk innan fyrirtækis)
Örstutta greinargerð um áhuga viðkomandi á þátttöku í Ungmennaráði Festu.
Senda tilnefninguna á festa@sjalfbaer.is fyrir 15. desember.

Úr innsendum tilnefningum veljum við 6 fulltrúa í ráðið. Sæti í ráðinu er til tveggja ára.

Sjálfbærni sem kjarni stjórnarstarfs

Tue, 18 Nov 2025 10:28:55 GMT

Málþing Festu fyrir stjórnir og framkvæmdastjórnir

Það var frábær mæting á annað málþing Festu fyrir stjórnir og framkvæmdastjórnir aðildarfélaga sem fór fram á Grand Hótel á föstudag undir yfirskriftinni „Ábyrgð og hlutverk stjórna í sviptivindum samtímans”. Málþingið leiddi saman stjórnarfólk úr fjölbreyttum atvinnugreinum þar sem við ræddum þær áhættur og tækifæri sem munu móta starfsemi stjórna á næstu árum þegar geopólitísk óvissa, loftslagsbreytingar, hröð tækniþróun og samfélagslegar áskoranir móta rekstrarumhverfi fyrirtækja. Í erindum og pallborðsumræðum kom skýrt fram að sjálfbærni er kjarni stefnumótunar fyrirtækja og að öflug áhættustýring og ákvarðanataka krefst bæði ímyndunarafls og aðlögunarhæfni.

Nýjar áskoranir gera nýjar kröfur til stjórna

Fundarstjóri dagsins, Erla Ósk Ásgeirsdóttir, setti tóninn í erindi sínu þar sem hún fjallaði um mikilvægi þess að stjórnir lyfti sér upp og horfi á stóru myndina til þess að geta betur tekið ákvarðanir og brugðist við ófyrirséðum áhættum. Hún minnti á að stjórnir verði að horfa á sjálfbærni í víðu samhengi þar sem hún skapar langtímavirði fyrir fyrirtæki sem og komandi kynslóðir.

Erlendu gestir málþingsins, þær Melanie Vezjak og Christine Nolasco frá CDP (áður Carbon Disclousure Project), kynntu niðurstöður nýjustu greininga á stöðu loftslags- og umhverfismála meðal stærstu fyrirtækja heims svokallað Corporate Health Check. Þær bentu á að aðgerðarleysi í loftslagsmálum gæti dregið úr vergri landsframleiðslu heimsins um 18% fyrir árið 2050 og sýndu hvernig fyrirtæki geti samþætt sjálfbærni inn í viðskiptalíkön sín til að skapa bæði stöðugleika og ný tækifæri til verðmætasköpunar.

Að bregðast við áhættum í íslenskum raunveruleika

Hafsteinn Hauksson, aðalhagfræðingur Kviku, fjallaði í erindi sínu um praktísk ráð gegn óhugsandi áhættum. Hafsteinn lagði áherslu á að geópólitískar ógnir hefðu áhrif á íslensk fyrirtæki hraðar en áður og ítrekaði að besta vörnin væri öflug áhættustýring þar sem reynir á ímyndunaraflið. Stjórnir þyrftu með öðrum orðum að læra að hugsa út fyrir kassann til að geta brugðist hratt við nánast óhugsandi ytri áhættum.

Hildur Einarsdóttir, forstjóri Advania, fjallaði um áhrif gervigreindar og tæknilausna á ákvarðanatöku fyrirtækja og lýsti því hvernig tækniframfarir og alþjóðlegar áskoranir móta nú umhverfi fyrirtækja meira en nokkru sinni fyrr. Hildur lagði áherslu á að það væri mikilvægt að standa vörð um málaflokkana sem falla undir sjálfbærni og að tækifæri Íslands til að nýta tækniþróunina til að styrkja samfélagslega innviði væri einstök, ef rétt væri haldið á spilunum.

Aðalsteinn Jónsson frá Cert-is lokaði erindahlutanum með yfirferð um helstu netöryggisógnir sem íslensk fyrirtæki standa frammi fyrir. Hann lagði áherslu á að gera megi ráð fyrir að það verði áframhaldandi vöxtur netárása þar sem skipulagðir hópar væru útbreiddasta ógnin og að stjórnir þyrftu að nálgast netöryggi sem hluta af heildarstefnu fyrirtækisins.

Í lok málþingsins tóku fjórir reyndir stjórnendur þátt í líflegu pallborði. Í umræðunum kom meðal annars fram mikilvægi þess að stjórnir séu vel undirbúnar undir fjölbreyttar sviðsmyndir og að þær viðhaldi stöðugri aðlögun að síbreytilegu alþjóðlegu rekstrarumhverfi. Þá lögðu þau einnig mikla áherslu á mikilvægi þess að fyrirtæki sjá fyrir þau tækifæri sem liggja í sjálfbærni þegar kemur að alþjóðlegu samkeppnisforskoti. Í pallborði voru Benedikt Gíslason, bankastjóri Arion banka, Tanya Zharov, aðstoðarforstjóri Alvotech, Heiðrún Jónsdóttir, framkvæmdastjóri SFF og stjórnarkona í Heimum, og Kristján Davíðsson, stjórnarformaður Brim og stjórnarmaður hjá Landsbankanum. Reynir Smári Atlason, forstöðumaður sjálfbærnimála hjá Creditinfo og stjórnarmaður Festu, stýrði pallborðsumræðum.

Málþingið undirstrikaði skýrt að stjórnir verða að rýna í áhættur samtímans með opnum hug, sterkri framtíðarsýn og frjóu ímyndunarafli. Ný tækni, alþjóðlegar áskoranir og auknar kröfur samfélagsins kalla á öfluga og ábyrga forystu á sama tíma og tækifærin sem felast í breytingunum geta verið gríðarleg, fyrir fyrirtæki, samfélagið og komandi kynslóðir.

Festa þakkar öllum þátttakendum fyrir frábæran dag og hlakkar til áframhaldandi samstarfs um að efla ábyrgð og hlutverk stjórna í síbreytilegum heimi.

Myndir: Ernir Eyjólfsson

Nýr samskiptastjóri Festu

Thu, 06 Nov 2025 14:09:42 GMT

Steinunn Jakobsdóttir ráðin samskiptastjóri Festu

Festa – miðstöð um sjálfbærni hefur ráðið Steinunni Jakobsdóttur sem nýjan samskiptastjóra félagsins. Steinunn kemur til Festu frá UNICEF á Íslandi þar sem hún starfaði síðustu tíu ár, fyrst sem fjáröflunarstjóri og síðar sem kynningarstjóri. Hjá Festu mun Steinunn leiða miðlun og ásýnd samtakanna út á við og sinna samskiptum við aðildarfélög, fjölmiðla og aðra hagsmunaaðila.

Steinunn býr yfir víðtækri alþjóðlegri reynslu á sviði samskipta, málsvarastarfs og stefnumótunar. Auk starfsins hjá UNICEF á Íslandi hefur hún unnið fyrir UNICEF í Kenía, alþjóðleg barnaverndarsamtök í Kambódíu, Tælandi og Laos og fyrir fjölmiðla á Íslandi. Hún er með BA-gráðu í heimspeki og stjórnmálafræði frá Háskóla Íslands, MS-gráðu í þróunarfræðum frá University College Dublin og viðbótardiplóma í umhverfis- og auðlindafræði frá Háskóla Íslands.

„Ég er mjög spennt fyrir nýju starfi hjá Festu. Sjálfbærni og loftslagsmál eru málefni sem snerta okkur öll og það er mér því dýrmætt að fá að vinna með öflugu teymi Festu og öllum ólíku aðildarfélögunum að jákvæðum breytingum fyrir samfélagið í dag og kynslóðir framtíðarinnar,“ segir Steinunn.

Elva Rakel Jónsdóttir, framkvæmdastjóri Festu segir: "Það er mikill akkur fyrir Festu að fá Steinunni til liðs við okkur með sína umfangsmiklu reynslu og verðmætu hæfni. Við hlökkum mikið til að þróa ásýnd og miðlun Festu áfram með henni."

Ráðherra og forstjórar taka höndum saman til að draga úr hlýnun jarðar

Thu, 16 Oct 2025 15:20:21 GMT

Gagnvirk vinnustofa Festu með EN-ROADS loftslagslíkaninu

Jóhann Páll Jóhannsson, umhverfis-, orku- og loftslagsráðherra, og hópur forstjóra stærstu fyrirtækja landsins voru meðal þátttakenda í gagnvirkri vinnustofu Festu, miðstöðvar um sjálfbærni, til að koma í veg fyrir hamfarahlýnun á næstu áratugum. Á vinnustofunni var notast við EN-ROADS loftslaghermilíkanið sem var þróað af MIT-háskóla og Climate Interactive. Forstjórarnir skipa hópinn Loftslagsleiðtogar Festu sem er hópur forstjóra fyrirtækja sem hafa sett sér metnaðarfull og markviss markmið þegar kemur að því að draga úr losun gróðurhúsalofttegunda.

Verkefni hópsins var að koma í veg fyrir að hlýnun jarðar nái 3,3 gráðum árið 2100, sem er sú þróun sem spáð er ef ekkert breytist. Þátttakendur tóku virkan þátt í greiningu og ákvarðanatöku með aðstoð EN-ROADS mælaborðsins og sáu í rauntíma hvernig ákvarðanir þeirra höfðu áhrif á loftslagsmarkmið. Með samvinnu, samningum og samþættingu aðgerða tókst ráðherra og forstjórunum að draga úr losun nægilega mikið til að lækka hlýnunina niður í 1,9 gráður.

„En-ROADS einfaldar flókin loftslagsvísindi. Þátttakendur geta séð með eigin augum hvernig aðgerðir, eins og orkuskipti, kolefnisgjöld, skógrækt og förgun kolefnis hafa samverkandi áhrif á hitastig jarðar. Það sem gerir En-ROADS einstakt er hvernig það tengir vísindi og stefnumótun á skýran, aðgengilegan og gagnvirkan hátt,” segir Ágústa Þóra Jónsdóttir, sem ásamt Aðalsteini Leifssyni leiddi vinnustofuna. Ágústa og Aðalsteinn eru fyrstu EN-ROADS sendiherrar hér á landi.

Ásta S. Fjeldsted, forstjóri Festi, var meðal þeirra Loftslagsleiðtoga sem tóku þátt í vinnustofunni og var ánægð með æfinguna:

„Til að ná raunverulegum árangri í loftslagsmálum og orkuskiptum þurfum við að einblína á hagnýtar lausnir sem hafa áhrif strax í dag. Fyrirtæki samanstanda af fólkinu í landinu — við berum ábyrgð og getum verið hreyfiafl breytinga en skýr stefna og fyrirsjáanleiki frá stjórnvöldum er jafnframt forsenda þess að fyrirtæki geti fjárfest af krafti og tekið stærri skref í átt að samdrætti í losun. Þess vegna var það mikilvæg æfing, samtal og samstaða sem átti sér stað hér í dag milli atvinnulífs og stjórnvalda, sem gaf góða tilfinningu fyrir samhengi hlutanna í þessu kapphlaupi við tímann um að halda hlýnun jarðar í

skefjum. Við í Festi vonum að það leiði til raunverulegra aðgerða,“ segir Ásta.

Festa, miðstöð um sjálfbærni, stendur fyrir fjölda viðburða og vinnustofa á hverju ári og mun halda áfram að efla samtal milli atvinnulífs og stjórnvalda um loftslagsmál.

„Við hjá Festu þökkum öllum þátttakendum fyrir öflugt samtal og virka þátttöku í vinnustofunni. Við erum flest fullviss um að ef við værum einráð í smá tíma og gætum hreyft við öllum breytum þá gætum við leyst loftslagsvandann. EN-ROADS líkanið sýndi okkur að enginn leysir þessa áskorun eins sína liðs og engin ein lausn kemur okkur alla leið í mark. Við hvetjum því fleiri til að kynna sér þetta gagnlega verkfæri og prófa sig áfram,“ segir Elva Rakel Jónsdóttir, framkvæmdastjóri Festu að lokum.

EN-ROADS hermilíkanið hefur verið notað víða um heim af leiðtogum í stjórnmálum, viðskiptalífi og menntakerfi til að efla gagnreynda umræðu og ákvarðanatöku í loftslagsmálum. Hermilíkanið er öllum opið á https://en-roads.climateinteractive.org .

Festa leitar að samskiptaleiðtoga

Wed, 06 Aug 2025 11:34:48 GMT

Vertu rödd sjálfbærni á Íslandi

Festa – miðstöð um sjálfbærni leitar að drífandi og hugmyndaríkum einstakling til að leiða samskipti og ásýnd samtakanna út á við. Við erum frjáls félagasamtök sem hraða umbreytingu íslensks atvinnulífs í átt að hringrásarhagkerfi og sjálfbærni. Nú vantar okkur kraftmikinn samskiptaleiðtoga sem vill hafa áhrif á framtíð samfélagsins og stuðla að markmiðum Festu með öflugri miðlun og áhrifaríkum samskiptum.

Í þessu mikilvæga hlutverki mun viðkomandi vinna þétt með framkvæmdastjóra og teymi Festu að mótun og framkvæmd skýrrar stefnu í miðlun, markaðssetningu og upplýsingagjöf. Við leitum að einstaklingi með sterka sýn á hvernig samskipti geta skapað raunveruleg áhrif.

Helstu verkefni og ábyrgð:

Móta og tryggja að miðlun Festu endurspegli stefnu og framtíðarsýn samtakanna.
Viðhalda og efla tengsl við fjölmiðla, samstarfsaðila og aðildarfélög Festu.
Stýra nokkrum af kjarnaverkefnum Festu.
Hafa umsjón með samfélagsmiðlum, vefsíðu, fréttabréfum og öðrum miðlum samtakanna.
Framleiða markviss og áhrifarík skilaboð í orði og mynd.
Skipuleggja og styðja við viðburði, ráðstefnur og útgáfur.
Nýta gögn og mælingar til að hámarka áhrif miðlunar.
Ritstýra ársskýrslu og öðru efni sem Festa gefur út.

Menntunar- og hæfniskröfur:

Háskólamenntun og reynsla sem nýtist í samskiptum, miðlun eða markaðsstarfi.
Þekking og reynsla af miðlun, almannatengslum og/eða markaðssetningu.
Framúrskarandi færni í íslensku og ensku, bæði rituðu og töluðu máli.
Leikni í stafrænum miðlunartólum (t.d. Meta Business Suite, Canva, Mailchimp) er mikill kostur.
Góð almenn stafræn hæfni og tæknilæsi.
Hæfni til að vinna sjálfstætt og stýra verkefnum af fagmennsku.
Sköpunargleði og hæfni til að móta áhrifarík skilaboð.
Þekking eða áhugi á sjálfbærni.

Festa býður:

Áhugavert og fjölbreytt starf í skemmtilegu umhverfi með tækifæri til að vinna með sérfræðingum úr ólíkum geirum samfélagsins.
Lítið og samhent teymi sem vinnur að raunverulegum samfélagslegum áhrifum.
Sveigjanlegan vinnutíma og möguleika á fjarvinnu eftir samkomulagi – við treystum fólki til að finna jafnvægi.
Tækifæri til að vaxa bæði faglega og persónulega í hvetjandi starfsumhverfi.

Festa er lifandi og metnaðarfullur vettvangur þar sem hægt er að leiða verkefni og skapa sýnilegan árangur. Við erum ekki rekin í hagnaðarskyni, og aðild að Festu eiga um 200 fyrirtæki, stofnanir og sveitarfélög. Samfélag Festu er einstakt tengslanet leiðandi aðila á sviði sjálfbærs reksturs og nýsköpunar. Framtíðarsýn Festu er að íslenskt samfélag og atvinnulíf verði leiðandi á sviði sjálfbærni.

Við hvetjum öll áhugasöm, óháð kyni og uppruna, til að sækja um.

�� Umsóknarfrestur er til og með 17. ágúst 2025.

�� Skrifstofa Festu er staðsett í Háskóla Reykjavíkur.

Umsókn skal fylgja ferilskrá og hnitmiðað kynningarbréf þar sem fram kemur ástæða umsóknar og rökstuðningur fyrir hæfni umsækjanda til að gegna starfinu.

Umsjón með ráðningarferlinu hafa Auður Bjarnadóttir ( audur@vinnvinn.is ) og Garðar Óli Ágústsson ( gardar@vinnvinn.is ) hjá Vinnvinn.

Þriðji fundur forstjóra í verkefninu Loftslagsleiðtogar

Tue, 08 Apr 2025 13:00:46 GMT

Forstjórar í verkefninu Loftslagsleiðtogar hittust í þriðja sinn föstudaginn 4. apríl. Í þetta sinn var rætt um kolefnismarkaði og -einingar, ásamt því stóra verkefni atvinnulífs og stjórnvalda að draga úr losun svo Ísland geti staðið við alþjóðlegar skuldbindingar, en Ísland hefur skuldbundið sig til að draga úr samfélagslosun um 29% fyrir árið 2030 miðað við losun ársins 2005.

Á fundinum fórum við yfir ýmis tæknileg atriði með sérfræðingum, í þetta sinn þeim Rafni Helgasyni frá atvinnuvegaráðuneytinu, Helgu Barðadóttur frá umhverfis-, orku- og loftlagsráðuneytinu, Rakel Evu Sævarsdóttur frá Trail Sustainability og Guðmundi Sigurbergssyni frá International Carbon Registry.

Verkefnið, sem dregur innblástur frá svipuðum verkefnum víðsvegar um heiminn (Climate CEOs), leiðir saman forstjóra frá aðildarfélögum Festu til að bæði vinna að metnaðarfullum loftslagsmarkmiðum og hvetja stjórnvöld og önnur fyrirtæki til aðgerða. Í september 2023 skrifuðu níu forstjórar eða staðgenglar þeirra undir stefnuyfirlýsingu verkefnisins og á árinu 2024 var unnið að því að stækka hóp loftslagsleiðtoganna og skerpa á markmiðum þeirra. Alls eru 17 forstjórar í verkefninu í dag.

Það vantar ekki kraftinn frá íslensku atvinnulífi þegar kemur að vilja og metnaði í loftslagsmálum - þessu gríðarlega mikilvæga verkefni sem þarfnast samvinnu atvinnulífs og stjórnvalda ásamt stuðningi frá samfélaginu og fjárfestum.

Ný stjórn og ársskýrsla

Fri, 28 Mar 2025 11:01:02 GMT

Ný stjórn og ársskýrsla

Aðalfundur Festu - miðstöðvar um sjálfbærni fór fram í gær, 27. mars. Fundur fór fram í húsnæði Háskólans í Reykjavík og var vel mætt.

Ný stjórn

Á aðalfundinum var kosinn ný stjórn, en í stjórn Festu sitja fulltrúar sjö aðildarfélaga, auk fulltrúa frá Háskólanum í Reykjavík þar sem skrifstofa Festu er staðsett. Aldrei hafa jafn margir boðið sig fram til setu í stjórn Festu, en það voru í heildina fulltrúar 13 aðildarfélaga sem lögðu fram framboð

Erla Ósk Ásgeirsdóttir var kosin nýr formaður á fundinum. Hún tekur við af Tómasi N. Möller sem hefur gengt stöðu formanns sl. 5 ár.

Stjórn Festu 2025 – 2026 skipa:

• Formaður: Erla Ósk Ásgeirsdóttir - Bláa Lónið

• Rakel Eva Sævarsdóttir, Trail

• Bryndís Björk Ásgeirsdóttir, Háskólinn í Reykjavík

• Reynir Smári Atlason, Creditinfo

• Anton Birkir Sigfússon, Hagar

• Hlédís Sigurðardóttir, Arion Banki

• María Rúnarsdóttir, Heimar

• Bjarni Már Gylfason, Rio Tinto á Íslandi

Tómas N. Möller lætur af formennsku eftir fimm ára setu. Skrifstofa Festu skilar hjartans þökkum til Tómasar fyrir leiðtogahlutverkið og hans verðmæta framlag til félagsins og aðildarfélaga sl. ár. Festa þakkar einnig fráfarandi aðilum úr stjórn fyrir einstaklega góða vinnu.

Ársskýrsla Festu var einnig gefin út í dag og það í fyrsta sinn á vefformi

Mikilluppgangur var í starfinu okkar á árinu 2024. Við bættust 27 ný aðildarfélög og hefur hópur aðildarfélaga aldrei verið jafn fjölbreyttur. Uppselt var á Janúarráðstefnu Festu sem er stærsti árlegi viðburður félagsins og þá sóttu mörg hundruð manns aðra fjölbreytta viðburði yfir árið þar sem megin markmiðið er að efla íslenskt samfélag á vettvangi sjálfbærni. Haldin var í fyrsta sinn málstofa þar sem hugað var að ábyrgð stjórna fyrirtækja þegar kemur að sjálfbærni, en á málþingið mættu tæplega 100 fulltrúar stjórna aðildarfélag Festu. Um þetta og margt fleira, ásamt myndum og tölulegum upplýsingum, má nálgast í ársskýrslunni.

Skoða ársskýrslu.

Febrúarfréttir

Thu, 27 Mar 2025 10:12:58 GMT

Fréttabréf Festu í febrúar

Allt sem þú þarft að vita um Janúarráðstefnuna

Fri, 07 Mar 2025 10:19:54 GMT

Allt um Janúarráðstefnuna

Fullt á málþing fyrir stjórnir og framkvæmdastjórnir

web@sahara.is (Sahara Web) — Sun, 12 Nov 2023 18:02:32 GMT

Lesa n ánar hér:

https://www.sjalfbaer.is/malthing-stjornir