Janúarráðstefna Festu 2026

English version below. Ráðstefnan verður á íslensku en nokkur erindi verða á ensku.

Janúarráðstefna Festu er stærsti árlegi sjálfbærniviðburður á Íslandi og fer fram í Silfurbergi Hörpu föstudaginn 30. janúar 2026, undir yfirskriftinni Umbreyting er ákvörðun. Ráðstefnan hefur verið haldin árlega síðan 2013 og hefur fest sig í sessi sem einn mikilvægasti og líflegasti vettvangur landsins fyrir samræður, nýja sýn og innblástur um sjálfbærni í atvinnulífi og samfélagi.

Dagskrá hefst klukkan 12:30 en boðið verður upp á léttan hádegisverð milli 12:00 og 12:30. Að dagskrá lokinni verður boðið upp á drykki og almennt stuð.

Þema ráðstefnunnar í ár, umbreyting, á sérstaklega vel við í dag þar sem geópólitísk óvissa, loftslagsbreytingar, hröð tækniþróun og samfélagslegar áskoranir kalla á raunhæfar leiðir til umbreytingar meðal fyrirtækja, stofnana og almennings. En umbreyting gerist ekki af sjálfu sér, hún felur í sér ákvörðun um að trúa á framtíðina og snertir alla þætti sjálfbærni. Á Janúarráðstefnunni leiðir Festa saman brautryðjendur, sérfræðinga og skapandi hugsuði, innlenda jafnt sem erlenda, sem deila raunverulegum umbreytingarsögum úr ólíkum geirum atvinnulífsins. Ráðstefnan dregur fram hvernig breytingar sem þegar hafa tekist vel geta orðið öðrum innblástur, hvort sem um er að ræða fyrirtæki, stofnanir eða einstaklinga.

Elva Rakel Jónsdóttir framkvæmdastjóri Festu mun fundarstýra og Erla Ósk Ásgeirsdóttir formaður stjórnar Festu hefja dagskrá með ávarpi

Formleg dagskrá Janúarráðstefnunnar lýkur kl.16:00, en í kjölfarið geta gestir skálað og skemmt sér saman í lok dags þar sem DJ Sigrún Skafta sér um tónlistina.

Miðasala er hafin og hægt er að tryggja sér miða hér. Uppselt hefur verið á ráðstefnuna síðustu ár svo við hvetjum áhugasöm að tryggja sér miða sem fyrst.

Styrktaraðilar ráðstefnunnar eru Íslandshótel, Húsasmiðjan og Bláa lónið og þökkum við þeim innilega fyrir stuðninginn!

EN-ROADS vinnustofa sem sérstakur kaupauki

Í fyrsta sinn býður Festa upp á gagnvirka vinnustofu með EN-ROADS loftslaghermilíkaninu sem sérstakan kaupauka. EN-ROADS var þróað af MIT-háskóla og Climate Interactive og er notað víða um heim af leiðtogum í stjórnmálum, atvinnulífi og menntakerfi til að efla gagnreynda umræðu og ákvarðanatöku í loftslagsmálum. Eftir miðakaup er hægt að skrá sig á til þátttöku hér. (Athugið að þetta á bara að vera gaman og fræðandi og engin sérþekking á loftslagsmálum nauðsynleg til að taka þátt).

Dagskrá ráðstefnunnar spannar fjölbreytt sjónarhorn á umbreytingu, þar á meðal loftslagsvísindi, nýsköpun í atvinnulífi, matvælaframleiðslu, tækni, félagslega sjálfbærni, menningu, sögu, húmor og persónulega reynslu.

Fyrirlesarar í ár (ath með því að velja myndirnar af þeim hér fyrir neðan má kynna sér þau nánar) :

Tim Lenton, einn fremsti loftslagssérfræðingur heims og höfundur bókarinnar Positive Tipping Points: How to Fix the Climate Crisis, mun meðal annars kynna brautryðjendarannsóknir sínar á jákvæðum vendipunktum sem geta hraðað umbreytingu í átt að markmiðum Parísarsáttmálans;
Luukas Ilves, sérfræðingur í gervigreind og stafrænni stefnumótun og ráðgjafi stjórnvalda í Úkraínu og Eistlandi, deilir reynslu af stafrænni byltingu, í friði jafnt sem átökum. Hann hefur meðal annars hlotið friðarverðlaun Úkraínu fyrir störf sín til stuðnings Úkraínu eftir allsherjarinnrás Rússlands;
Birta Kristín Helgadóttir, mun meðal annars ræða hvernig ískenskar orkulausnir geta lagt sitt að mörkum til að mæta alþjóðlegum orkuskorti og hraðað sjálfbærri umbreytingu;
Deniz Koca kynnir nýjar aðferðir til að tryggja matvælaöryggi í heiminum þar sem réttar ákvarðanir á réttum stað geta knúið fram kerfisumbreytingar;
Arnhildur Pálmadóttir og Benedek Regoczi munu sýna hvernig nýsköpun í hönnun og auðlindanýtingu geta ýtt undir raunverulegar breytingar innan sjávarútvegs og byggingariðnaðarins og stuðlað að sjálfbærri verðmætasköpun.
Kasper Bjørkskov kynnir okkur fyrir sinni sýn á kerfsi umbreytingar, en hann vinnur á mörkum hönnunar, vísinda og samfélagslegrar umbreytingar og er þekktur fyrir að knýja fram kerfisbreytingar í byggingariðnaðinum í Danmörku og víðar.
Ragnhildur Þórðardóttir, betur þekkt sem Ragga Nagli, er landsþekkt fyrir fræðandi og beinskeytta pistla um andlega og líkamlega vellíðan og jákvæða hugsun, á ráðstefnunni mun hún fara yfir það með okkur hvernig umbreyting samfélaga byrjar hjá einstaklingnum.
Stefán Pálsson munu síðan setja umbreytingu sögulegt samhengi, en sagan getur verið öflugt verkfæri þegar við tökum ákvarðanir um framtíðina

Trúnópörin eru orðin fastur liður og í ár höfum við fengið með okkur algjörar kanónur!

Á sviðinu munu mætast einstaklingar sem eru hvert um sig leiðandi innan síns geira og því óhætt að lofa óvæntum, einlægum og stórskemmtilegum samtölum sem fara út fyrir boxið um þema ráðstefnunnar, Umbreytingu.

Þórdís Kolbrún Reykfjörð Gylfadóttir alþingismaður og fyrrv. utanríkisráðherra og Bogi Ágústsson fyrrverandi fréttamaður
Halldór Benjamín Þorbergsson forstjóri Heima og Sigríður Hagalín Björnsdóttir rithöfundur
Katrín Jakobsdóttir fyrrverandi forsætisráðherra og Haraldur Ingi Þorleifsson frumkvöðull
Halldóra Geirharðsdóttir leikkona og Páll Óskar Hjálmtýsson söngvari

Please note that the conference will be in Icelandic, but there will be several presentations in English.

Festa’s January Conference is Iceland’s largest annual sustainability event. The conference will take place in Harpa on January 30 under the theme “Transformation is a Decision.”

Transformation requires the decision to believe in the future, and at the conference, Festa brings together influential voices, experts, and creative thinkers, Icelandic and international, who will share real transformation stories from across different sectors of the economy.

Umbreyting er ákvörðun