VIÐBURÐIR FESTU 2025

Tengslafundir

Tengslafundir Festu eru meðal skemmtilegustu viðburðanna okkar þar sem aðildarfélög skiptast á að bjóða í heimsókn, deila reynslu og áskorunum og skapa rými fyrir samtal og tengslamyndun. Á árinu héldum við alls átta slíka fundi hjá ólíkum fyrirtækjum og stofnunum sem sýndu með skýrum hætti hvernig sjálfbærni birtist í ólíkum geirum atvinnulífsins.

Hjá Brim fengum við innsýn í hvernig fyrirtækið vinnur verðmæti úr auðlindum sjávar í sátt við umhverfi og samfélag, ásamt þeim praktísku áskorunum sem fylgja ábyrgri nýtingu auðlinda. Creditinfo lagði áherslu á mikilvægi fræðslu innan fyrirtækja og hvernig upplýst starfsfólk og stjórnendur geta skapað samræmi, skilvirkni og aukið nýsköpun í sjálfbærnivegferðinni.

Í heimsókn til Krónunnar var fjallað um hvernig sjálfbærni snertir hvern einasta starfsmann, áhrif í virðiskeðjunni og hvernig stefnumótun getur haft jákvæð áhrif á viðskiptavini og sjálfbærari neyslu. Hjá Utanríkisráðuneytinu fengum við innsýn í samstarf stjórnvalda og atvinnulífs í þróunarsamvinnu og kynningu á verkefni umhverfis,- orku- og loftslagsráðuneytisins um yfirstandandi stefnumótunarvinnu um líffræðilega fjölbreytni á Íslandi.

PwC Ísland fjallaði um þróun upplýsingagjafar og lærdóm af fyrstu CSRD skýrslunum í Evrópu, auk þess sem farið var yfir sjálfbærnivísi PwC og staðfestingu ófjárhagslegra mælikvarða. Hjá EFLU var sjónum beint að árangri í umhverfis- og loftslagsmálum, vistferilsgreiningum og kynningu á Matarspori sem hjálpar fyrirtækjum og almenningi að bera saman kolefnisspor og næringargildi máltíða.

Sorpa sýndi hvernig hringrásarhugsun er innleidd í rekstri, allt frá mötuneytum og framkvæmdum til þeirrar stóru umbreytingar sem nú á sér stað í meðhöndlun textílúrgangs. Hjá Arion banka fengum við að lokum innsýn í hvernig sjálfbærni er orðin hluti af áhættustýringu, stefnumótun og ákvarðanatöku bankans, auk þess sem sagt var frá verkefninu Konur í fjárfestingum sem stuðlar að auknu jafnvægi á fjármálamarkaði.

Tengslafundirnir minna okkur á að sjálfbærni birtist með ólíkum hætti eftir starfsemi, áskorunum og tækifærum hvers aðildarfélags sem hafa sameiginlegan vilja til að læra, miðla þekkingu og vinna saman að raunverulegum umbreytingum.

Deiglufundir

Deiglufundir Festu eru rafrænir og hnitmiðaðir fræðslufundir fyrir aðildarfélög þar sem kafað er dýpra ofan í einstök málefni sem brenna á fyrirtækjum hverju sinni. Þar fá þátttakendur innsýn frá sérfræðingum og aðildarfélögum sem deila reynslu, áskorunum og lausnum úr eigin rekstri. Á árinu héldum við alls fimm slíka fundi sem spönnuðu fjölbreytt og tímabær viðfangsefni.

Á fundi um EU Taxonomy fengum við reynslusögur frá aðildarfélögum sem hafa birt upplýsingar samkvæmt Flokkunarreglugerð ESB. Þar var rætt hvað hefði gengið vel, hvaða áskoranir hefðu komið upp og hvað smærri fyrirtæki gætu lært af vegferð þeirra. Einnig var horft til næstu skrefa í þróuninni, hlutverks yfirstjórnar og samstarfs við stjórnvöld.

Á Deiglufundi um félagslega sjálfbærni og innri mannauð var sjónum beint að ávinningi fjölbreytts og öflugs mannauðs og hvernig mannréttindi, inngilding og jafnrétti styðja við sjálfbæran og árangursríkan vinnustað. Þar var jafnframt farið yfir alþjóðlega þróun og hvernig fyrirtæki bregðast við breyttum áherslum í þessum málaflokki.

Fundur um gervigreind og sjálfbærni í rekstri fjallaði um hvernig gervigreind er þegar farin að hafa áhrif á ýmsa þætti sjálfbærni og reksturs. Þar var rætt um tækifæri, áskoranir og hvernig fyrirtæki geta nýtt tæknina á ábyrgan og markvissan hátt.

Á fundi um sjálfbær innkaup var lögð áhersla á þann mikla kraft sem felst í innkaupum sem tæki til umbóta. Með markvissum innkaupum geta fyrirtæki hrint stórum hluta sjálfbærnistefnu sinnar í framkvæmd. Sérfræðingar frá ólíkum aðildarfélögum deildu þar reynslu af því hvernig þau hafa innleitt stefnu um sjálfbær innkaup með bæði umhverfis- og félagslega þætti að leiðarljósi.

Á síðasta Deiglufundi ársins var kastljósinu beint að umbúðum og plasti í ljósi nýs regluverks Evrópusambandsins um umbúðir og umbúðaúrgang. Þar var rætt um áhrif breytinganna á íslensk fyrirtæki, hvernig draga megi úr sóun og umhverfisáhrifum og hver staðan sé á innleiðingu regluverksins hér á landi.



Deiglufundirnir sýna vel mikilvægi þess að skapa vettvang fyrir dýpri umræðu um málefni sem eru bæði flókin og breytast hratt. Með því að tengja saman reynslu úr atvinnulífinu, sérfræðiþekkingu og nýjustu þróun verður til hagnýtt samtal sem nýtist aðildarfélögum beint í þeirra daglega starfi.

EN-ROADS vinnustofa Loftslagsleiðtoga

Jóhann Páll Jóhannsson, umhverfis-, orku- og loftslagsráðherra, og hópur forstjóra stærstu fyrirtækja landsins voru meðal þátttakenda í gagnvirkri vinnustofu Festu til að koma í veg fyrir hamfarahlýnun á næstu áratugum. Á vinnustofunni var notast við EN-ROADS loftslaghermilíkanið sem var þróað af MIT-háskóla og Climate Interactive. Forstjórarnir skipa hópinn Loftslagsleiðtogar Festu sem er hópur forstjóra fyrirtækja sem hafa sett sér metnaðarfull og markviss markmið þegar kemur að því að draga úr losun gróðurhúsalofttegunda.

Verkefni hópsins var að koma í veg fyrir að hlýnun jarðar nái 3,3 gráðum árið 2100, sem er sú þróun sem spáð er ef ekkert breytist. Þátttakendur tóku virkan þátt í greiningu og ákvarðanatöku með aðstoð EN-ROADS mælaborðsins og sáu í rauntíma hvernig ákvarðanir þeirra höfðu áhrif á loftslagsmarkmið. Með samvinnu, samningum og samþættingu aðgerða tókst ráðherra og forstjórunum að draga úr losun nægilega mikið til að lækka hlýnunina niður í 1,9 gráður.

EN-ROADS hermilíkanið hefur verið notað víða um heim af leiðtogum í stjórnmálum, viðskiptalífi og menntakerfi til að efla gagnreynda umræðu og ákvarðanatöku í loftslagsmálum.

Málþing fyrir stjórnir og framkvæmdastjórnir

Í nóvember stóð Festa annað árið í röð fyrir málþingi fyrir stjórnir og framkvæmdastjórnir aðildarfélaga undir yfirskriftinni Ábyrgð og hlutverk stjórna í sviptivindum samtímans.  Málþingið fór fram á Grand Hótel þar sem kom saman reynslumikið stjórnarfólk, forstjórar og sérfræðingar úr ólíkum áttum til að ræða helstu áhættur og áskoranir stjórna til skemmri og lengri tíma, hvort sem eru netöryggisógnir, loftslagsbreytingar, samfélagslegur þrýstingur eða óstöðugt efnahagsumhverfi.

Erla Ósk Ásgeirsdóttir, stjórnarformaður Festu og fundarstjóri málþingsins, lagði áherslu á að stjórnir þurfi að horfa á stóru myndina og skilja sjálfbærni í víðu samhengi. Í erindum og pallborðsumræðum kom skýrt fram að sjálfbærni er kjarni stefnumótunar fyrirtækja og að öflug áhættustýring og ákvarðanataka krefst bæði ímyndunarafls og aðlögunarhæfni. Málþingið undirstrikaði skýrt að stjórnir verða að rýna í áhættur samtímans með opnum hug, sterkri framtíðarsýn og frjóu ímyndunarafli. Ný tækni, alþjóðlegar áskoranir og auknar kröfur samfélagsins kalla á öfluga og ábyrga forystu á sama tíma og tækifærin sem felast í breytingunum geta verið gríðarleg, fyrir fyrirtæki, samfélagið og komandi kynslóðir. 

Rafrænn viðburður með Stjórnvísi



Á sameiginlegum viðburði Festu og Stjórnvísi í desember var sjónum beint að því hvernig loftslagsbreytingar geta haft áhrif á rekstur, hvernig við getum beitt ímyndunarafli í áhættustýringu og hversu vel fyrirtæki og opinberir aðilar eru undirbúin fyrir vaxandi loftslagsáhættu. Viðburðurinn bar heitið Áhættustýring og loftslagsbreytingar – Er þitt fyrirtæki berskjaldað?

Dr. Anna Hulda Ólafsdóttir, sérfræðingur í loftslagsaðlögun hjá Veðurstofu Íslands, fjallaði um mögulegar afleiðingar loftslagsbreytinga á Íslandi; Hafsteinn Hauksson, aðalhagfræðingur Kviku banka, ræddi hvernig bregðast megi við svokölluðum „óhugsandi áhættum“ og Dr. Mikael Allan Mikaelsson, sérfræðingur í loftslagsstefnumótun hjá Stockholm Environment Institute, fór yfir hvernig loftslagsbreytingar eru að endurmóta áhættulandslag íslenskra fyrirtækja og hagkerfisins í heild. Virkilega áhugaverðar umræður sköpuðust eftir erindin þar sem meðal annars var rætt um áhrif loftslagsbreytinga á íslenskt atvinnulíf og hvernig samstarf hins opinbera og einkageirans geti styrkt efnahagslegt öryggi á tímum vaxandi loftslagsáhrifa.