Fjármagnið leitar þangað sem áhættan er þekkt
Fjölmenni á málþingi Festu um fjárfestingar og sjálfbærni
Fjárfestar vilja sjá að fyrirtæki þekki áhættuna í rekstri sínum, geti brugðist við henni og leggi fram áreiðanlegar upplýsingar um þá sjálfbærniþætti sem hafa áhrif á rekstur og afkomu. Þetta voru meðal helstu skilaboða málþings Festu, Hvert leitar fjármagnið?, sem fór fram á Grand Hótel 12. nóvember.
Þetta var í þriðja sinn sem Festa stendur fyrir málþingi sérstaklega ætlað fulltrúum í stjórnum og framkvæmdastjórnum aðildarfélaga. Þar komu saman fulltrúar fyrirtækja, banka, fjárfesta og lífeyrissjóða til að ræða hvaða þætti fjárfestar leggja áherslu á og hvað það þýði fyrir stjórnir og stjórnendur.
Gögn um áhættu geta opnað dyr að fjármagni
„Fjármagnið leitar þangað sem áhættan er þekkt“ sagði Halldór Benjamín Þorbergsson, forstjóri Heima, þar sem hann fór yfir það hvernig félagið hefur samþætt sjálfbærni, áhættugreiningu og rekstrarumbætur. Með því að markvisst safna og greina gögn, um meðal annars orkunotkun og ástand fasteigna, hefur félagið öðlast betri yfirsýn yfir áhættu í eignasafni sínu, skapað tækifæri til hagræðingar og styrkt rekstrarstöðu sína. Tæpur helmingur fasteignasafns Heima í dag eru sjálfbærnivottaðar byggingar og Halldór benti á að staða félagsins í sjálfbærnimálum hefði opnað aðgang að fjárfestum sem annars hefðu ekki komið inn með fjármögnun.
Carla La Tona, sérfræðingur í sjálfbærum fjármagnsmörkuðum hjá Deutsche Bank, tók undir mikilvægi þess að fyrirtæki þekki og stýri áhættu sinni og nefndi að fjárfestar horfi í auknum mæli til fjárhagslegra áhrifa loftslagsbreytinga. Hún hvatti fyrirtæki til að segja sjálf sína sögu með áreiðanlegum upplýsingum um þá sjálfbærniþætti sem raunverulega skipta máli fyrir reksturinn. Carla nefndi einnig að þrátt fyrir neikvæða umræðu og breytingar á evrópsku regluverki haldi markaðurinn fyrir sjálfbær skuldabréf áfram að vaxa.
Vöxtur gervigreindar skapar markað fyrir orkusparandi lausnir
Í erindi sínu beindi Ari Helgason, fjárfestir og stofnandi vísi sjóðsins Transition Ventures, sjónum að tækifærunum sem felast í lausnum við loftslagsbreytingum og lagði áherslu á að hægt væri að byggja upp verðmæt fyrirtæki sem eru að takast á við loftslagsáskoranir. Ari sagði eftirspurn á markaði í auknum mæli knýja fram þróun nýrra lausna. Hann nefndi hraðan vöxt gervigreindar sem dæmi um þróun sem eykur orkuþörf og skapar um leið eftirspurn eftir lausnum sem nýta orku betur. Að hans mati geta fjárfestingar í fyrirtækjum sem þróa hagkvæmar lausnir við vaxandi orkuþörf og auðlindaskorti bæði skilað góðri fjárhagslegri ávöxtun og stuðlað að betri nýtingu auðlinda og þannig stuðlað að sjálfbærari framtíð.
Stefán Friðriksson, svæðisstjóri Norræna fjárfestingarbankans á Íslandi, velti fram spurningunni hvernig fyrirtæki skapa varanleg verðmæti fyrir reksturinn, samfélagið og komandi kynslóðir. Hann veitti innsýn í hvernig bankinn horfir á sjálfbærni þegar ákvarðanir um fjárfestingu eru teknar og hvernig sjálfbærni getur verið hluti af því að meta gæði fyrirtækja. Fjárfestingar í sjálfbærum lausnum gætu meðal annars dregið úr orku- og hráefnisnotkun, lækkað rekstrarkostnað og minnkað líkur á kostnaðarsömum áföllum. Þannig gætu þær styrkt bæði fjárhagslega stöðu fyrirtækja og samfélagið í heild.
Velferð starfsfólks er forsenda árangurs
Verðmætasköpun til framtíðar snýst ekki eingöngu um fjárfestingar í tækni, innviðum og umhverfisvænum lausnum, heldur líka um fjárfestingu í fólki. Sigríður Hrefna Hrafnkelsdóttir, framkvæmdastjóri Samkaupa, minnti á að mannauðurinn væri ein mikilvægasta auðlind fyrirtækja og sagðist vona að fjármagnið leitaði þangað sem fólk fengi að vaxa. Sigríður Hrefna sagði frá reynslu sinni hjá Nóa Síríus þar sem hún gengdi hlutverki forstjóra, fyrirtækið var aðlagað að starfsfólkinu en ekki öfugt og velferð fólks sett í forgrunn samhliða viðsnúningi í rekstri. Hún hvatti fjárfesta til að horfa lengra en til hefðbundinna fjárhagslegra mælikvarða og spyrja hvernig fyrirtæki færu með fólkið sitt, því velferð starfsfólks væri forsenda fyrir árangri.
Fjárfestar vilja gögn um það sem skiptir reksturinn máli
Snædís Ögn Flosadóttir, forstöðumaður markaða hjá Arion banka, stýrði pallborðsumræðum. Þar tóku þátt Ari Helgason, Jón Guðni Ómarsson, bankastjóri Íslandsbanka, Kristbjörg M. Kristinsdóttir, fjármálastjóri Stefnis, og Rebekka Ólafsdóttir, forstöðumaður áhættustýringar hjá Gildi lífeyrissjóði.
Í líflegum umræðum kom fram að þótt minna fari fyrir sjálfbærni í umræðunni þýði það ekki að fyrirtæki séu ekki að einblína á þessi mál. Fjárfestar gera fremur ráð fyrir að fyrirtæki hafi þessi mál í lagi en að þurfa að spyrja sérstaklega um þau. Þátttakendur bentu á að þótt kröfur evrópsks regluverks breytist þá vilja fjárfestar áfram fá traustverðugar upplýsingar um þá sjálfbærniþætti sem hafa raunveruleg áhrif á rekstur og fjárhag fyrirtækja.
Áhersla var lögð á að sjálfbærni og fjárhagsleg ávöxtun væru ekki andstæður heldur væri þekking á áhættu, góðir stjórnarhættir og ábyrg langtímahugsun og í raun forsenda verðmætasköpunar. Áhersla á sjálfbærni dregur úr áhættu og skapar verðmæti til lengri tíma. Þátttakendur minntu jafnframt á að loftslagsbreytingar, auðlindaskortur og aðrar langtímaáskoranir hverfa ekki þótt geopólitískar áherslur breytist.
Rauði þráður málþingsins var skýr: Sjálfbærni skapar mest verðmæti þegar hún er samþætt stefnu, stjórnun og daglegum rekstri fyrirtækja. Fyrirtæki sem þekkja eigin áhættu, einbeita sér að þeim þáttum sem raunverulega skipta máli, fjárfesta í fólki og geta sýnt fram á ávinning aðgerða með áreiðanlegum gögnum munu að endingu standa betur að vígi í samkeppninni um fjármagn.












